當社會在鬧烘烘的討論菜園村, 我家都曾有過一個討論: 要是我家的地也有人要收回, 我們會接受嗎? 我們的結論: 可能有點可惜, 但絕對接受.
我們是原住民, 絕對不是單純是地主, 或是租戶. 附近一帶住的都是鄉親父老. 那邊十數年前開始有地產商在發展, 有不少地土被收購. 其中我家有超過一半的農地就被收購了.
從前的土地肥沃, 而且地下水豐富. 記得以前有口井水, 會源源不絕的流出地下水. 不過慢慢, 土地都變得沒以前那麼肥, 井水, 亦流乾了.
我相信, 回憶才是最重要的, 無論回憶之地仍然存在與否. 縱使地方仍在, 但其實已經無法回到以往的景象了.
不過, 家裡最不想放棄的, 還是那塊農地. 因為自己種自己吃的樂趣實在是大. 不過媽說, 要是那地被收回, 有筆錢, 去禽獸花園買間屋就是了.
事實上, 不止是我家有這種想法. 在一年一度的家族聚會(i.e., 拜太公), 村長提及有地產商在探風, 各長老回應都是一致叫好.
原來, 有時即使在一個地方扎根三代, 也會樂意連根拔的.
又過年了, 上一年好似過得好快..
上年講過家裡過年通常會有既過程, 今年不如睇下相 XD
大除夕晚上必用碌柚葉沖涼, 食完晚飯就會用個大鑊煲水..
(Um..電話個閃燈好黃… /_\) 其實呢個鑊多數都係用黎蒸糕點, 過年既蘿蔔糕/年糕, 清明重陽的茶果清明仔都係呢度蒸. 底下係燒柴的, 用柴火蒸野o的野都好食o的(感性地覺得 XD)
年初一朝早食完早餐要拜神, 屋企拜神要”擺陣” XD 首先要準備材料..
炸過的粉絲同枝竹, 豆卜(有紅色的), 仲有菠菜蠔豉髮菜金針雲耳冬菇等等, 放入雞公碗度…
菠菜盤係底, 插上枝竹再用其他野圍住佢…就會變成咁樣喇:
拜完神之後就會將佢拆開, 用南乳煮成齋, 成為初一的午飯.
同一餐飯通常都會有(電飯煲)蒸豆豉.. 可能係以前阿爺鍾意食卦..
屋企一向都係清明節重陽節正日去拜山既. 以前去拜山其實係好辛苦既, 因為o的位置實在太偏僻了…
記得以前拜山係要分兩日既. 其中一日早上係祖屋(元朗近屏山)出發, 踩單車向附近既一坐山進發, 去到山腳既一條小路, 半行半爬的上到去一個小空地就有一排金塔要拜. 然後再半爬半行上去半山位置又有另一排金塔, 但只有一條窄窄既小平地, 次次都怕一個唔小心就碌左落山既… 拜完之後就會踩單車返去祖屋, 食個飯之後就向另一個山頭出發. 呢個山頭有好多墳既, 所以已經開晒路, 比較容易.
至於另一日, 就會去到大欖行行山徑, 行到一半位置左右既山邊位置, 一個有好多樹既地方就要係樹林之中爬上去 (好鬼神秘…)
好辛苦咁上到去就係一塊好大塊既空地, 有兩個墳…
其實仲有太公山要拜, 每年重陽之後既星期日都會去拜, 幾乎同一條村入面姓林既男丁都會去. 太公山其實近天水圍既, 我地多數都係踩單車去既, 以前山腳下係空地一塊, 但後來變左個左[車太]車場…除左路程比較辛苦之外, 其實都無乜野, 因為o的長輩會搞掂一切 XD
講番屋企一直拜開果幾個地方..因為實在太難去了, 陸續地所有墳都搬左去比較容易去果個山頭, 每次拜山都只需要去一個山頭就搞掂, 拜山都輕鬆左好多. 以前只有家裡既男丁去拜, 但自從阿爺去左之後, 因為都係葬係同一個山頭, 所以就多左好多親戚去拜.
最辛苦都係除草… 因為係山頭, 野草好多, 多到可以將整個墳遮住晒, 不過比起以前黎講已經好好多架喇. 每次拜山見到草既數量就可以總結果半年多唔多雨水 XD
細個其實覺得好奇怪, 點解有o的墳係一排金塔但有o的只係一個既呢? 原來一排金塔果o的有好多其實係食客. 聽屋企人講, 食客即係你俾飯佢食, 佢就幫你做野既人, 而且通常係來自異鄉既. 佢地死後因為無屋企人, 所以葬埋一齊, 等o的後人會拜下佢地咁.
除草之後就開始拜, 但都有次序既, 輩份較高既人既墳會先拜. 每個塔/墳都放三張錢(溪錢), 放好祭品, 三個大杯三個小杯三碗飯三雙筷放得整整齊齊. 所謂先敬茶後敬酒, 所以先倒茶(大杯)後倒酒(小杯)的. 點蠟燭裝香, 再敬拜一番之後就燒衣紙. 之後敬茶敬酒就移到下一個墳, 重覆所有動作直至最後果個墳. 以前我地會切燒肉黎食既, 食o的生果飲下飲品之後先走既. 但係近幾年都直接返去算數lu….
臨走前仲要派錢, 飯 同灰.. 聽屋企人講派錢/飯係俾附近既遊魂野鬼既, 而灰就係幫個墳劃地盆…
總覺得一系列既程序有佢既意義, 而且(我覺得)都算係一種傳統既藝術.. 所以將佢寫低以作紀錄 :)
如常的去了嫲嫲那裡過中秋. 仲記得細果既時候, 有一年問阿爺拎左條鐵線, 就挷係門前兩棵大樹之間, 用黎掛燈籠. 之後就年年都係咁掛, 仲會用o的木條整船仔, 中間點支蠟燭, 放係小水池之中. 就咁就已經好滿足..
然後當日通常仲會 BBQ, 屋後面拎o的磚, 加個鐵絲網就係一個爐, 好高興…
過幾年, 人大左都已經無玩燈籠了. 但表弟妹都會玩, 仲會係地下點蠟燭, 到第二日朝早就要用剷將o的蠟剷走..
唔知幾時開始, 就無再 BBQ 了, 亦無再係中秋節係嫲嫲果邊過夜.
呢幾年既中秋節, 都只係點幾個燈籠就過去了, 感覺少左o的氣氛, 好像只是大家吃個晚飯而已..
兩年前爺爺走了, 現在感覺更冷清… 沒有賞月的雅興, 沒有中秋的氣氛.
連月餅都沒有多咬一口, 在我心中中秋節好像已經消失了.
~~
