每逢清明/重陽, 都會有自家製的茶果及清明仔.
我諗好多人都食過茶果, 都唔使點介紹, 比較起上來,
我就喜歡吃清明仔多一點了 XD
一粒粒的清明仔, 質感不像糯米糍般, 亦不像飽點, 而是一個粉團, 實實在在的質感.
而實際上, 清明仔的確是一個蒸熟的粉團, 粉團混有花生碎, 沒有其他材料.
而粉團最重要的材料是雞屎藤, 加上桑葉所造成的汁, 混在粉團中使到清明仔的顏色
啡啡綠綠的.
味道方面, 則是甜的 (亦有時會造鹹的), 帶有少許(極少)香味, 不能說是很美味,
但可以說是值得一試的傳統食物.
(一文兩貼… 呢個版本長少少:X)
祖屋在元朗, 但祖屋比較細, 祖母就住旁邊的一間屋.
由於是種田的, 每年都會種蘿蔔做蘿蔔糕. 今年新種了些椰菜,
很好吃.
說回過年的指定動作.. 其實一切都在祖母家渡過…
年三十晚, 下午通常會做蘿蔔糕, 不過有時會早一兩日做好..
年糕就多數會早好多日做定, 阿女麻手指唔好, 做年糕要搓熱粉,
好辛苦的, 近年都做少左, 只做幾個剛好每個仔女有一個拿回家"發".
年三十晚食團年飯, 老豆果邊全部親戚會返晒黎食..廿幾三十人左右..
不過因為女多, 所以好多時佢地要去另一邊的團年, 所以年三十晚的團年
通常只有十數人.
之後就會係老豆同阿叔 (即是男丁…) 一家(即係包括我…) 會留係度過一晚夜,
宵夜會吃湯丸, 第二朝年初一, 一早起身向阿女麻拜年, 以往年初一家家戶戶會燒炮仗,
現在炮仗難買又捉得緊, 所以都少了. 不過總會聽到遠處祠堂(鄧氏那邊)的長炮仗,
最後一聲是特別響的.
吃少少東西做早餐(要吃齋)後, 就開始煮齋做午飯, 材料係拜神用既東西..
我地拜神係用雞公碗, 內放炸粉絲, 雲耳, 豆卜, 菠菜, 慈菇, 髮菜, 蠔豉
加上一條炸過的枝竹直插係以上材料上…
咁煮果陣就會用南乳煮埋一堆, 都唔錯架.
仲有個湯, 齋湯…用紅蘿蔔, 蠔豉, 髮菜, 馬碲, 冬菇, 白果煲的.. 因為無肉,
要落重鹽調味先好食. 通常會炒多個菜就係當日午餐.
午餐之後就可以食肉了.
然後年初二晚, 會係同一地點食開年飯, 又係全世界返晒黎食, 但今次同年三十晚
不同, 因為多數都會返齊人, 所以年年都會廿幾三十人,
菜式都很豐富, 通常會有姑丈從鄉下沙井帶來的蠔(btw.. 祖屋所在地叫"沙井村",
真巧合…), 有時會有大陸買來的燒鴨. 其餘菜式, 大多數是由母親所做..
年年都煮到一頭煙, 不過都會有我和大佬充當二三廚 XDDD
幸好洗碗的有其他親戚自動自覺 XDD
指定動作就咁完成..
